Öllum er okkur ljóst að fyrir dyrum eru dagar endursköpunar. Þar geta allir lagt sitt lóð á vogarskálarnar. Saman horfumst við í augu við það verkefni að skapa nýja sýn á framtíð landsins.

Það er okkur mikið metnaðarmál að finna ný markmið, gefandi markmið, snjöll og frjó markmið sem skapa sanna og varanlega hagsæld. Því er það okkur kappsmál að tvinna saman þann sköpunarmátt sem í okkur öllum býr, flétta haldreipi, efna í sterkan vef, kveikja nýja sýn og trú á gott mannfélag í sátt við landið og lífið í landinu.

Gæðin sem við njótum í dag eigum við að þakka fyrirhyggju eldri kynslóða, heita og kalda vatnið á heimilum okkar, rafmagnið, sjúkrahúsin, skólakerfið og margvíslegar samfélagsstofnanir velferðarþjóðfélags. Það góða líf sem við Íslendingar nútímans höfum lifað fram til þessa er forsjálni þeirra að þakka.

Nú er komið að okkur. Hvaða land viljum við byggja okkur, börnum okkar og afkomendum? Hvernig Ísland viljum við - hver er framtíðarsýn okkar?

Við þurfum að hugsa saman, vinna saman og ná árangri saman.

Ég hvet ykkur því til að taka þátt í átakinu Framtíðarsýn þjóðar.

Verkefninu er ætlað að gefa þjóðinni allri, ungum sem öldnum, tækifæri til að koma skoðun sinni á framfæri á þessum tímamótum í sögu þjóðarinnar.

Kærar kveðjur,

Vigdís Finnbogadóttir, verndari verkefnisins